Nami Gedung Islamic Center Ciamis janten Gedung KH Irfan Hielmy
(Dipedar ku Kang Dadang ghani
Sejarah Gedung Dakwah Ciamis kapungkur dugi ka Islamic Center ayeuna henteu leupas ti peranan sareng para ulama umaro Ciamis kalebet mantenna. Ti kawit Gedung Dakwah Islam nu diwangun taun 1968 palih kidul mesjid Agung puseur dayeuh waktos Bupati RH Abu Bakar. Teras mantenna sareng sadaya Ulama Ciamis ridho kana dialihkeunna Gedung Dakwah ti puseur ka Kertasari. Kawitna diadegkeun heula YPKIC tahun 2007 kanggo ngadadasaran ngadegkeun Islamic Center nu ngalih ka Kertasari dugi ka diresmikeun ku Bupati Engkon taun 2012, dua tahun saparantos Almaghfurlah dipundut Kunu Agung dicandak Kunu Kawasa taun 2010.
Aya sababaraha point pangemut simkuring (Dadang G) nu janten santri mantenna, atuh ngahaturkeun nuhun ka Pamarentah Daerah sareng ka masyarakat Ciamis anu tos maparin “Penghargaan" éta. Kahiji, Mantenna ti kawit nyepeng pasantren dina yuswa 25 an tahun tos janten galih galeuhna para Ulama Ciamis, sok kaulem kaditu kadieu dina pasualan pamarentahan atanapi sosial. Mantenna dipercanten ngeusi materi dina pangaosan-pangaosan nu digagas ku Pemerintahan Daerah Ciamis dugi ka pupusna, kantos oge lami janten Pembantu Imam Militer sejak tahun 1957 dugi ka taun 1963 di Kodim Ciamis sareng janten Roh-res di Kepolisian Resort Ciamis tahun 1966-1972. Waktos harita sadaya anggota TNI sareng Polisi saciamis mah caket sareng mantenna sok janten rujukan pataosan dina pasualan kaislaman atanapi kaagamaan. Janten Anggota DPRD Kabupaten Ciamis taun 1967-1972, Anggota MPR RI taun 1997-1999, Ketua Umum MUI Kabupaten Ciamis taun 1998-2010 tangtos waktos ieu teras2an ngakhidmat ka umat. Kadua, Mantenna aya dina lintas ormas Keagamaan, margi amanat para ulama sareng umaro Ciamis yen gedong dakwah atanapi Islamic Center mah kudu jadi pemersatu umat. Tah katawis dina biografi mantenna, yen mantenna aya di mana-mana. Di NU na, sanaos anom kénéh kantos ngiring Muktamar NU ka 23 taun 1962 di Surakarta Solo, janten galih sareng Kyai2 Jawa dina Bahsul Masail, muktamar ka 24 di Bandung Ogé taun 1967. Kantos ogé janten pemateri Ahli Sunnah wal Jamaah 7 dinten 7 wengi acara GP Anshar di Sidoarjo kapungkur. Atuh di Muhammadiyahna oge kagungan nomer Baku Muhammadiyah sareng di taun 1953 janten Guru PGA Muhammadiyah nu waktos harita dibuka ku H. Kholil Afandi. Di PUI na kantos janten Kepala Sekolah SD PUI Dewasari taun 1957-1964, guru PUI Cijantung ti Taun 1954. Mantenna paham pisan kana nilai perjuangan PUI nu diadegkeun ku KH Abdul Halim sareng KH Ahmad Sanusi anu janten senior Mama Fadil Ayahna. Atuh di organisasi sanesna sapertos Persatuan Islam mantenna tiasa neuleuman pola pikir Kapersisan sareng tiasa ngabejerbeaskeun deui ka jama'ahna. Katilu, Kantos dina biografina, dina yuswa 25 taunan mantenna tos mimpin pasantren saterasna kapilih janten sekertaris dina pertemuan pertama Badan Musyawarah Alim Ulama (BMAU) pada 18 Maret 1957 di Tasikmalaya , organisasi ieu salah sawios janten Cikal Bakal Majelis Ulama Indonesia dorongan ti wilayah Priangan
Kaopat, dina taun 1975, mantenna ngagagas motto pasantren, nyaeta Muslim Moderat, Mukmin Demokrat, dan Muhsin Diplomat. Motto ieu tos seueur ditalungtik ku para peneliti, komo ayeuna nuju usum moderasi beragama, mantenna pulihan taun kapengker ngagagas eta. Gagasan moderatna aya di buku2 sareng makalah2na nu katingal dina poto dihandap.
Kalima, Mantenna mah akrab ka sadayana teu pandang bulu timana wae, warnana naon wae nu penting mah kagungan pamaksadan sae kanggo umat.
Mugia Gedung KH Irfan Hielmy ieu, janten manfaat pisan kanggo umat. mugia pahla na teras ngocor ka mantenna!
